CHANGAMOTO ZA BIASHARA KATI YA TANZANIA NA ZAMBIA KUTATULIWA

MWANDISHI WETU, NAKONDE

mtwarapressclub@gmail.com

Tanzania na Zambia zimekubali kutatua changamoto 25 za kibiashara zilizopo ifikapo Novemba 30, 2023, ili kuiwezesha sekta binafsi kufanya biashara bila vikwazo vyovyote baina ya nchi hizo.

Hayo yamesemwa na Waziri wa Viwanda na Biashara Dkt. Ashatu Kijaji na Waziri wa Biashara na Viwanda wa Zambia Chipoka Mulenga wa Zambia wakiwa pamoja na Naibu Waziri wa Uchukuzi wa Tanzania David Mwakiposya Kihenzile, walipokutana na kushiriki Mkutano wa Pili wa Pamoja wa Kujadili Changamoto za Biashara baina ya nchi hizo ngazi ya Mawaziri uliofanyika katika Mpaka wa Nakonde, Zambia Novemba 07, 2023.

Dkt. Kijaji amesema makubaliano ya kutatua changamoto hizo yanatokana na utekelezaji wa Maagizo ya Rais wa Jamhuri ya Muungano wa Tanzania Dkt. Samia Suluhu Hassan alipokutana na Rais wa Zambia Hakainde Hichilema katika ziara ya Kitaifa nchini humo Oktoba 23 – 25, 2023 na kukubaliana kuiwezesha Sekta Binafsi kufanya biashara baina ya nchi hizo.

Aidha, amesema nchi hizo pia zimekubaliana kutatua changamoto hizo kwa haraka na kuhakikisha kuwa kila changamoto inayojitokeza baina ya nchi hizo itatatuliwa ili kuiwezesha sekta binafsi kufanya biashara kwa uhuru ili kukuza biashara na uchumi wa nchi hizo kwa kuwa Sekta Binafsi ni injini ya kukuza uchumi kwa mataifa yote mawili

Naye Waziri Mulenga amesema nchi hizo zimekubaliana kutatua changamoto hizo ili kuiwezesha sekta binafsi kujenga uchumi imara chini ya misingi iliyowekwa na Waasisi wa nchi hizo Baba wa Taifa Mwalimu Julius Nyerere na Hayati Kenneth Kaunda iliyoziwezesha nchi hizo kuishi kwa amani na utulivu.